روايه بير الجن
خلاص كده جاهزين ياصاحبي
كله تمام.
اشطا انا هروح احجز ٤ تذاكر طيران على بكره كلم ماجد وسامح عشان يستعدوا.
ايوه بس انت لسه عيد ميلادك باقي عليه كام يوم!
مش مشكله نقضيهم هناك بعد مانعمل اللي رايحين عشانه اهو حتى نرتاح من المغامره ونفسح العيال الجبانه دي اللي واثق انهم هيعملوا مواقف وطرائف هناك بس اللي متأكد منه كمان انها هتكون رحلة العمر.
طلعت من أوضتي عالميعاد وانا لابس وماسك شنطتي في إيدي واخويا وامي شافوني واتصدموا.
اتقدمت عليا امي وقالتلي
خليك فاكر انك رايح تعمل حاجه انا مش راضيه عنها وخليك فاكر إن اخوك حذرك كتير وكمان أفتكر إن اللي بيشيل قربه مخرومه بتخر على دماغه لوحده ومهما الناس تعاطفت معاه محدش بيشيل شيلة حد.
مابلاش يابن والدي واخذي الشيطان اللي واخدك ورايح بيك لهلاكك ده. ياخالد ارجوك انت ممكن تكون واخد الموضوع كلعبه ظريفه بس هو مش كده خالص.
نزلت الشنطه من إيدي وقربت عليه وه من غير ولا كلمه وبعدت عنه وحت امي واخدت شنطتي ومشيت وكل دا من غير ما أنا ولا حد فيهم ينطق بكلمه كان وداع صامت وغريب بصيتلهم وانا عالباب لاخر مره وشفت فعيونهم خوف لو حد غيري كان رجع عن تفكيره بسببه بس انا تجاهلته وقفلت الباب ونزلت جري وانا حاسس اني رايح املك العالم كله ومش مهم اي حاجه تانيه في الدنيا.
وصلنا اخيرا اليمن وطلعنا من المطار وركبنا تاكسي وفادي طلب من سواقه انه يودينا فندق كبير بس يكون فيه مرشد سياحي.. وبالفعل وصلنا التاكسي لفندق اسمه تاج سبأ والفندق كان فخم جدا وطلبنا مرشد كويس وقالولنا إن فيه واحد إسمه ابو ريان دا ملم بكل معالم البلد وحافظ كل أماكنها زي كف ايدهوكمان اصله مصري يعني هيكون سهل التفاهم معاه.
والإداره هتوصله بينا او هتخلي حد من العمال يوصله لأوضتنا.
طلعنا الاوضه وقعدنا نستريح وابتدينا نتكلم واكتر اتنين كانوا بيتكلموا ومنطلقين انا وفادي اما سامح وماجد فكانوا اغلب الوقت ساكتين.
وبعد شويه ماجد بص لفادي وقاله
ايييه ياعم فادي مش هتأكلنا فيومك الحلو دا ولا واخدنا مقاوله صايمه ولا ايه
فادي
ليه يعني ليه الاوفر اللي انت فيه دا
ماجد
لا ياحبيبي مش اوفر ولا حاجه بس اللي بيكونو هيع. دموه بيسألوه نفسك في ايه قبل ماتم. وت واللي بيطلبه بيجيبوهوله.
فادي
وهو انا رايح اعدم كم عشان اقولكم كده
ماجد
لا ماانت هتعدل الجمله هتقولنا نفسكم فأيه قبل ماتتلبسوا.
على فكره ممكن تطلع كل دي خرافات والبير يطلع مفهوش اي حاجه وتكون مجرد تجربه هبله ويكون الناس مطلعه عالبير دا إشاعات عشان ناس يجيبها الفضول زي حلاتنا وتيجي من اخر الدنيا تزوره وبكده يكونوا عملوا مزار سياحي يجيبلهم دخل.
رد عليا سامح
ايوه هنكدب ٣٥ مليون نسمه اجتمعوا على ان البير اللي فبلدهم مسكن للجن ونصدقك انت يابو لمعه.. اقعد علي جنب بس ومتحاولش تهون الموضوع احنا عارفين نفسنا رايحين جه نم رايحين. ودلوقتي اتفضل يا أستاذ فادي الزفت اسمع كلام ماجد واطلبلنا ديك رومي وحمام ومحشي ونص خروف مشوي عالفحم.
فادي
ايه دا ليه كل ده
سامح
حلاوة روح.. او طفاسة روح سميها زي ماتسميها المهم اطلب وخلصني.
وفعلا طلب فادي كل اللي قال عليه سامح وبعد ساعه الاكل جه واكلنا كلنا وبصراحه كانت وليمه محصلتش.
خلصنا اكل وباب الاوضه خبط ودخل ابو ريان.
السلام عليكم.. ادارة الفندق بلغتني انكم عايزين مرشد سياحي وطلبتوني بالإسم وانا تحت امركم عايزين تروحوا مكان معين ولا تحبوا انظملكم انا رحله لأجمل المناطق السياحية اليمنيه
انا وفادي ردينا فصوت واحد
لبير برهوت.
ابو ريان
يالطيف ليه كده
ماجد
لا ابدا بس عندنا حفله هناك.
ابو ريان
هو انتوا مسمعتوش حاجه
